SOVRIN Magazine

ទម្លាប់សំខាន់ៗ៥យ៉ាងដែលជួយពង្រឹងនូវការចងចាំឱ្យកាន់តែប្រសើរឡើង

TRAVEL & LIVING one year ago

ការចងចាំបានល្អវាអាស្រ័យទៅលើសុខភាព និងភាពរឹងមាំនៃខួរក្បាលរបស់មនុស្សម្មាក់ៗ ព្រោះខួរក្បាលប្រៀបបានទៅនឹងអង្គចងចាំមួយដែលដំណើរការដូចម៉ាស៊ីន ហើយវាតែងតែកត់ត្រា និងថតទុកជានិច្ចនូវរាល់សកម្មភាពទាំងឡាយដែលកំពុងតែកើតមានឡើងជារៀងរាល់ថ្ងៃ។ ដូចគ្នានេះដែរ អង្គចងចាំអាចប្រឈមទៅនឹងបញ្ហាជាច្រើនក្នុងនោះ គេសង្កេតឃើញថាភាគច្រើនមនុស្សតែងមានការភ្លេចភ្លាំងជាញឹកញាប់ ដែលជាកត្តាមួយដ៏សំខាន់នាំឱ្យអ្នកវិទ្យាសាស្ត្រតែងព្យាយាមស្វែងរកដំណោះស្រាយមកទប់ស្កាត់នូវបញ្ហាទាំងអស់នេះផងដែរ។ ជាក់ស្តែង បច្ចុប្បន្ន អ្នកស្រាវជ្រាវបានរកឃើញនូវគន្លឹះមួយចំនួនដែលអាចពង្រឹងនូវការចងចាំរបស់មនុស្សឱ្យកាន់តែប្រសើរឡើង ចុះតើគន្លឹះទាំងនោះមានអ្វីខ្លះ?

កាត់បន្ថយការទទួលទានជាតិស្ករ៖ វាពិតជាសំខាន់ខ្លាំងណាស់ចំពោះខួរក្បាលក្នុងការយកចិត្តទុកដាក់លើរបបអាហារ ព្រោះអាហារគឺជាកត្តាសំខាន់បំផុតក្នុងការផ្គត់ផ្គង់រាងកាយរបស់យើង។ អាហារដែលមានជាតិស្ករច្រើនអាចធ្វើឱ្យយើងមានកម្លាំងភ្លាមៗក៏ពិតមែន ប៉ុន្តែវាក៏មានតួនាទីក្នុងការកាត់បន្ថយការចងចាំដូចគ្នាផងដែរ។ អ្នកស្រាវជ្រាវបានរកឃើញថា ការទទួលទានចំណីអាហារមានជាតិស្ករច្រើនអាចប៉ះពាល់ទៅដល់ប្រព័ន្ធប្រសាទ ដែលជំរុញឱ្យខួរក្បាលមានការភ្លេចភ្លាំងដែលជាសញ្ញាដំបូងនៃជំងឺ Alzheimer។ ហេតុនេះហើយ ដើម្បីបង្ការនឹងហានិភ័យនេះ អ្នកគួរតែចៀសវាងអាហារដែលប្រើស្ករច្រើនដូចជា ដំណាប់ និងភេសជ្ជៈកំប៉ុង ព្រោះភាគច្រើននៃអាហារទាំងនេះមានរសជាតិផ្អែមខ្លាំង ដែលនាំឱ្យប៉ះពាល់ដល់ប្រព័ន្ធប្រសាទយ៉ាងរហ័ស។

ហាត់ប្រាណជាប្រចាំ៖ ការធ្វើលំហាត់ប្រាណយ៉ាងតិចណាស់៣០នាទីក្នុងមួយថ្ងៃបានផ្តល់នូវអត្ថប្រយោជន៍ជាច្រើនចំពោះសុខភាពផ្លូវកាយ និងផ្លូវចិត្ត។ ជាក់ស្តែង ការធ្វើលំហាត់ប្រាណគឺជាផ្នែកមួយធ្វើឱ្យអារម្មណ៍ស្រស់ស្រាយ ពិសេសជួយជំរុញដល់ការចងចាំបានល្អទៀតផង។ ម៉្យាងវិញទៀត ប្រសិនបើអ្នកធ្វើលំហាត់ប្រាណជាប្រចាំ នោះវាអាចបង្ការនៃការប្រឈមនឹងជំងឺវង្វេង ឬភ្លេចភ្លាំងស្មារតីនាពេលអនាគត។ ការហាត់ប្រាណដូចជា ជិះកង់ ការដើរ ការរត់ និងសកម្មភាពផ្សេងទៀតដែលធ្វើឱ្យសារពាង្គកាយអាចបញ្ចេញជាតិញើសបានគឺសុទ្ធសឹងតែជាកាយវិការមួយជួយឱ្យប្រព័ន្ធការពាររាងកាយរឹងមាំល្អ។ ដូច្នេះប្រសិនបើលោកអ្នកមិនអាចចេញទៅហាត់ប្រាណនៅក្លិបកីឡាក្ដីក៏លោកអ្នកគួរតែឆ្លៀតហាត់ប្រាណនៅក្នុងបរិវេណផ្ទះតាមតែអាចធ្វើទៅបាន។

ហ្វឹកហាត់ខួរក្បាលោ៖ ត្រឹមតែការធ្វើលំហាត់ប្រាណនៅមិនទាន់គ្រប់គ្រាន់នោះទេ បន្ថែមលើសពីនេះអ្នកក៏ត្រូវមានការហ្វឹកហាត់ខួរក្បាលកុំឱ្យស្ពឹកផងដែរ ដោយត្រូវរៀនវិភាគទៅលើបញ្ហាដែលកើតឡើងនៅចំពោះមុខ ឬសាកល្បងលេងល្បែងកម្សាន្តណាដែលអាចស្ទង់ពីសមត្ថភាពក្នុងការគិតពិចារណា ដែលជួយឱ្យខួរក្បាលរបស់អ្នកគិតដូចជា អាន លេងឧបករណ៍ភ្លេង ឬល្បែងផ្គុំពាក្យជាដើម។ អ្នកអាចសាកល្បងនូវវិធីទាំងនេះនៅពេលទំនេរ ឬសម្រាកពីការសិក្សា និងការងារផ្សេងៗ។ នោះអ្នកនឹងអាចទទួលបានលទ្ធផលយ៉ាងល្អជាទីគាប់ចិត្តមិនខាន។

សម្រាកគ្រប់គ្រាន់៖ យ៉ាងណាក៏ដោយ ការសម្រាកគ្រប់គ្រាន់គឺជាកត្តាមួយជួយជំរុញដល់ការចងចាំផងដែរ។ អ្នកដឹងទេថា ស្ទើរតែ២៤ម៉ោងក្នុងមួយថ្ងៃ ដែលអ្នកបានប្រើប្រាស់ខួរក្បាលទៅលើរឿងរ៉ាវជាច្រើន ដូច្នេះអ្នកគួរតែបែងចែកពេលខ្លះសម្រាប់ឱ្យខួរក្បាលរបស់អ្នកបានសម្រាក។ ជាទូទៅ ទទួលទានដំណេកយ៉ាងហោចណាស់៧ម៉ោង ទៅ៨ម៉ោងក្នុងមួយយប់ ដើម្បីទទួលបានសុខភាព និងអង្គចងចាំល្អ។ រីឯការសម្រាកនៅពេលថ្ងៃវិញ វេជ្ជបណ្ឌិតបានណែនាំឱ្យយើងសម្រាកពី ២ ទៅ ៣ ថ្ងៃក្នុងមួយសប្ដាហ៍ ហើយក្នុងការសម្រាកម្ដងៗពី ៣០នាទី ទៅ ១ម៉ោង ឬហៅម្យ៉ាងទៀតថាគេងមួយស្របក់។ ការធ្វើបែបនេះនឹងធ្វើឱ្យស្មារតីរបស់អ្នកនឹងនរល្អ។

រក្សាសកម្មភាពផ្លូវចិត្ត៖ ការធ្វើឱ្យការចងចាំមានភាពរឹងមាំល្អយើងមិនមែនពង្រឹងតែសុខភាពផ្លូវកាយប៉ុណ្ណោះទេ តែសុខភាពផ្លូវចិត្តក៏ត្រូវការលើកទឹកចិត្តឱ្យមានការមើលថែ និងគ្រប់គ្រង់ឱ្យបានត្រឹមត្រូវផងដែរ។ ការរក្សាសកម្មភាពផ្លូវចិត្តបានល្អ វាសំខាន់ខ្លាំងណាស់ក្នុងការជំរុញការលូតលាស់នៃកោសិកាខួរក្បាលឱ្យលូតលាស់ថ្មី ដែលជាជំនួយដល់ការចងចាំមួយកម្រិតទៀត។ ចូលធ្វើសមាធិឱ្យបានច្រើន ដោយកាត់បន្ថយអារម្មណ៍ស្ត្រេស ឆេវឆាវ ឆាប់ខឹង និងគិតរឿងដែលមិនល្អច្រើនពេកក៏ធ្វើឱ្យប្រព័ន្ធភាពសុំាចុះខ្សោយផងដែរ៕

Article by NI CHANNIKA

SUGGESTIONS