Sovrin
Sovrin
តើអ្នកនឹងនឹកឃើញដល់អ្វីមុនគេនៅពេលដែលអ្នកចង់ឱ្យផ្ទះរបស់ខ្លួនមើលទៅស្អាតប្រកបដោយសោភណភាព? ជាធម្មតាមនុស្សគ្រប់គ្នាតែងតែគិតភ្លាមហើយក៏ធ្វើភ្លាមៗនូវរឿងដែលអាចធ្វើទៅបានដូចជា ការសម្អាត ការដុសលាងសម្ភារ ឬជួសជុលរបស់របរផ្សេងៗ។ យើងដឹងហើយថា មានសម្ភារជាច្រើនដែលអាចយកមកលម្អគេហដ្ឋាន ក្នុងនោះផ្កាក៏ជាផ្នែកមួយដ៏លេចធ្លោនៃការតុបតែងផ្ទះផងដែរ។ អ្នកអាចជ្រើសរើសផ្កាដែលធ្វើពីក្រដាស ឬក្រណាត់ផ្សេងៗ មកប្រើសម្រាប់ការតុបតែងផ្ទះ ព្រោះផ្កាប្រភេទនេះមិនមានក្លិនអាក្រក់ ដែលនាំឱ្យអ្នកមានអារម្មណ៍មិនល្អ ឬបញ្ហាផ្លូវដង្ហើមដូចការប្រើផ្កាស្រស់មួយចំនួននោះឡើយ។ អត្ថបទនេះ គេហទំព័រសូវរីនសូមណែនាំអំពីជំហាននីមួយៗដែលបង្ហាញពីវិធីក្នុងការធ្វើផ្កាដំណក់ទឹកភ្លៀងទៅកាន់មិត្តអ្នកអាន ដោយការយកក្រណាត់ម៉ាសទៅច្នៃទៅជាផ្កាដ៏ស្រស់ស្អាតផងដែរ។
សម្ភារដែលប្រិយមិត្តត្រូវការប្រើមានដូចជា ម៉ាស កាវធម្មតា ឬកាវទៀន( Glue machine) កន្ត្រៃ ដែកកាប់ ស្កុតនិងឆ្អឹងលួស។ សម្ភារទាំងអស់នេះងាយស្រួលក្នុងការស្វែងរកទិញ ដោយមានលក់តាមបណ្ដាទីផ្សារ និងដេប៉ូលក់គ្រឿងសំណង់នានា។
ជំហានដំបូង អ្នកត្រូវយកម៉ាសមកកាត់ជាជ្រុងតូចៗល្មម រួចច្រឹបតាមគែមជ្រុងនីមួយៗឱ្យចេញជាវាងអដ្ឋកោណ ព្រោះការធ្វើបែបនេះនឹងធ្វើឱ្យរាងរបស់ផ្កាកាន់តែមានសោភណភាព (អ្នកអាចប្រើម៉ាសពណ៌ផ្សេងៗតាមចំណូលចិត្ត)។
ជំហានបន្ទាប់ ដើម្បីធ្វើជាទងផ្កា អ្នកគ្រាន់តែយកដែកកាប់មកកាត់ឆ្អឹងលួសឱ្យខ្លីល្មម រួចពត់ចុងនៃឆ្អឹងលួសនោះឱ្យកោងចូលក្នុង សឹមយកកាវមកដាក់នៅចំណុចដែលបានពត់។
បន្ទាប់មកយកម៉ាសដែលកាត់ហើយនោះ មកដោតពីក្រោមទៅលើ ហើយសង្កត់វាឱ្យស្អិតជាមួយចុងដែក។ បន្តធ្វើបែបនេះ ៣ទៅ៤ស្រទាប់បន្ថែមទៀត ដើម្បីទទួលបានស្រទាប់ផ្កាដែលមើលទៅក្រាស់ល្អ។
ជំហានចុងក្រោយ យកឆ្អឹងលួសវែង ៣ទៅ៤ទង មករុំបញ្ចូលគ្នាសម្រាប់ធ្វើជាដើមផ្កា។ បន្ទាប់មកទៀត យកទងផ្កាដែលបានធ្វើហើយនោះមករុំជាមួយដើម ពីលើមកក្រោមចំនួន ១២ទៅ១៥ទង។ បន្តធ្វើបែបនេះ ៥ទៅ៦ដើម (អាចធ្វើច្រើន ឬតិចអាស្រ័យតាមចំណូលចិត្ត) រួចយកវាទៅតុបតែងតាមទីតាំងដែលអ្នកពេញចិត្ត។ គួរបញ្ជាក់ថា អ្នកអាចបាញ់ទឹកអប់ទៅលើផ្កាទាំងនោះ ដើម្បីទទួលបានក្លិនក្រអូបនិងអារម្មណ៍ស្រស់ថ្លា។
បន្ទាប់ពីបានបកស្រាយយ៉ាងក្បោះក្បាយអំពីរបៀបនៃការធ្វើផ្កាដំណក់ទឹកភ្លៀងខាងលើនេះហើយ យើងសង្ឃឹមថាប្រិយមិត្តនឹងចាប់អារម្មណ៍ហើយអាចយកមកធ្វើជាចំណេះដឹងមួយទៀតដើម្បីជាតិចនិកក្នុងការតុបតែងលម្អផ្ទះ និងបង្កើតគំនិតច្នៃប្រតិដ្ឋឱ្យកាន់តែសម្បូរបែប៕
Article by NI CHANNIKA
