Sovrin
Sovrin
គំនិតច្នៃប្រតិដ្ឋនៃហាងកាហ្វេទាំង៥ ដែលមានរចនាប័ទ្មតុបតែងប្លែកដាច់គេបំផុតនៅទីក្រុងភ្នំពេញ
NEWS 6 years ago
អាជីវកម្មហាងកាហ្វេនាពេលបច្ចុប្បន្ន យើងសម្គាល់ឃើញថាមានការកើនឡើងយ៉ាងគគ្រឹកគគ្រេង ក្នុងនោះមានទាំងហ្វ្រេនឆាយមកពីបរទេស និងខ្លះទៀតបង្កើតឡើងដោយសហគ្រិនវ័យក្មេងក្នុងស្រុកជាច្រើនដែលកំពុងតែរីកស្គុសស្គាយដូចជាផ្សិតជាពិសេសគឺនៅរាជធានីភ្នំពេញបេះដូងនៃព្រះរាជាណាចក្រកម្ពុជានេះតែម្តង។ ដោយហេតុហាងកាហ្វេជាកន្លែងសម្រាប់ធ្វើសង្គមនីយកម្មដ៏ពេញនិយម ពោលជាកន្លែងពិសេសមួយដែលមនុស្សក្នុងសម័យទំនើបចូលចិត្តមកជួបជុំជជែកកម្សាន្ត បង្កើតមិត្តភាពថ្មីៗ ហើយក៏ជាកន្លែងបំពេញការងារក្រៅម៉ោង កិច្ចការសាលា អានសៀវភៅ និងធ្វើជំនួញក្រៅផ្លូវការទៀតនោះ ហេតុនេះហើយទើបសហគ្រិនបើកអាជីវកម្មហាងកាហ្វេក្រោយៗ បានរិះរកគំនិតថ្មីៗជាមួយនឹងការរចនាហាងជាមួយនឹងការដេគ័រឲ្យមានលក្ខណៈពិសេសស្រស់ស្អាតប្លែក ដើម្បីជាភាពទាក់ទាញក៏ដូចជាញុំាងបរិយាកាសអង្គុយក្រេបឱជារសកាហ្វេកាន់តែមានរសជាតិឈ្ងុយឆ្ងាញ់ និងស្រស់ស្រាយឡើង។ ជាមួយគ្នានេះដែរ ខណៈហាងកាហ្វេបង្កើតថ្មីបានបង្ហាញខ្លួនជាបន្តបន្ទាប់ សូវរីន សូមនាំប្រិយមិត្តមកស្គាល់ហាងកាហ្វេទើបបើកថ្មីចំនួនប្រាំដែលមានរចនាប័ទ្មតុបតែងប្លែកសុទ្ធសឹងស្ថាបនាឡើងក្រោមស្នាដៃកូនខ្មែរដែលកំពុងច្បាមប្រជាប្រិយភាពយ៉ាងខ្លាំងនៅក្នុងរាជធានីភ្នំពេញ។
1.ផ្ទះបុរាណ ១៩៣១
វីឡាបុរាណស្កឹមស្កៃក្នុងរចនាប័ទ្មបីសាសន៍ បារាំង ចិន ខ្មែរ សាងសង់តាំងពីឆ្នាំ ១៩៣១ ដែលតាំងខ្លួនតាមបណ្តោយផ្លូវជាតិលេខ៥ នៅចម្ងាយប្រមាណប្រាំគីឡូម៉ែត្រពីទីក្រុងភ្នំពេញ ត្រូវបានស្ថាបនិកខ្មែរវ័យក្មេងមួយរូបធ្វើការកែលម្អបង្កើតជាហាងកាហ្វេដ៏ប្រណីត ដោយភ្ជាប់មកជាមួយពហុបំណងផ្សព្វផ្សាយពីវប្បធម៌ និងអរិយធម៌ខ្មែរផង ក៏ដូចជាឲ្យកូនខ្មែរស្គាល់នូវអ្វីដែលជាសម្បត្តិបេតិកភណ្ឌរបស់ខ្លួនឯងផងដែរ។ បង្អួតសម្រស់ខាងក្រៅជាមួយនឹងវីឡាពណ៌លឿងលេចធ្លោ ហាក់អន្ទងរាល់ភ្នែកភ្ញៀវធ្វើដំណើរឆ្លងកាត់ឲ្យអត់ទ្រាំនឹងចោលក្រសែភ្នែកមកពុំបាន ឬបានឈានជើងចូលមកម្តងក៏អស់ចិត្តដែរ។ ផ្នែកខាងក្នុងត្រូវបានរចនាតុបតែងថ្មីផ្ទុយស្រឡះពីផ្នែកខាងក្រៅ ពោលជាហាងកាហ្វេក្នុងទម្រង់បែបបុរាណបន្តិចលាយសម័យបន្តិច សំខាន់រូបភាពចាស់ៗបង្ហាញពី ប្រាសាទអង្គរ របាំល្ខោនខោល និងរូបបង្ហាញពីទិដ្ឋភាពរស់នៅរបស់ប្រជាជនខ្មែរពីជំនាន់មុនៗជាច្រើនសរុបប្រមាណ ៣០០ផ្ទាំង បានមកតម្រៀបតាំងបង្ហាញជាជួរដែលបង្កឲ្យបរិយាកាសពិសាកាហ្វេកាន់តែទោរទន់ប្រៀបបីដូចកំពុងសុបិនទៅកាន់អតីតកាល។ ផ្ទះបុរាណ ១៩៣១ មិនត្រឹមតែផ្តល់នូវបទពិសោធន៍រសជាតិកាហ្វេមកពីអ៊ីតាលីប៉ុណ្ណោះទេ តែថែមទាំងមានបម្រើអាហារបីពេលយ៉ាងឈ្ងុយឆ្ងាញ់ផងដែរ។
2.Book Café
សៀវភៅប្រមាណជាង ៨០០០ក្បាល បានកំពុងរង់ចាំស្វាគមន៍អ្នកស្រឡាញ់ការអាន ឲ្យចូលមកអង្គុយក្រេបរសជាតិកាហ្វេឈ្ងុយឆ្ងាញ់អមនឹងការអានសៀវភៅច្រើនប្រភេទដើម្បីបង្កើនចំណេះដឹងនៅឯ Book Café។ ទីនេះប្រៀបបីដូចជាបណ្តាល័យអានសៀវភៅដូច្នោះដែរ ដែលប្រជុំទៅដោយសៀវភៅច្រើនប្រភេទទាក់ទងទៅនឹង នយោបាយ សេដ្ឋកិច្ច ច្បាប់ សុខភាព កីឡា និងប្រលោមលោកនានា ដែលផ្តល់ជូនអានសេរីក្នុងបរិយាកាសស្ងប់ស្ងាត់ល្អលាយឡំគយគន់នឹងការរៀបចំតាំងលម្អនូវវត្ថុចាស់ៗយ៉ាងប្រណីតសល់តាំងពីសម័យសង្គមរាស្ត្រនិយមរហូតដល់ទសវត្សរ៍ទី ៩០ ដូចជា ម៉ូតូ ឧបករណ៍ចាក់តន្ត្រី ចង្កៀង ទូរសព្ទ និងកាសែតចាស់ៗជាង ១០០ប្រភេទ សុទ្ធសឹងគួរឲ្យចង់ដឹងគួរឲ្យចង់ស្វែងយល់ជាទីបំផុត។ ហាងកាហ្វេដែលមានទីតាំងនៅក្នុងបុរីមហាសែនសុខស្ថិតក្នុងខណ្ឌសែនសុខនេះដែរ ក៏មានផ្តល់ជូននូវបន្ទប់ប្រជុំសម្រាប់ការជួបជុំចែករំលែកបទពិសោធន៍ក៏ដូចជាចំណេះដឹងគ្នាទៅវិញទៅមកផងដែរ។ ក្រេបរសជាតិកាហ្វេឈ្ងុយឆ្ងាញ់បណ្តើរ អានសៀវភៅបណ្តើរពិតជាធ្វើឲ្យពេលវេលាអង្គុយលម្ហែពោរពេញទៅដោយអត្ថន័យថែមទាំងចំណេញបានទាំងចំណេះតាមរយៈការអានដូចដែលគេពោលថា អាចច្រើនកើនចំណេះ។
3.Plants Café
សាងសង់លើទំហំផ្ទៃដី ៦០០ម៉ែត្រការ៉េ ស្ថិតលើផ្លូវបឹងតាម៉ាតក្នុងសង្កាត់ចំការដូង សំណង់រាងចតុកោណមើលឃើញឆ្លុះដល់ខាងក្នុងតាមរយៈជញ្ជាំងកញ្ចក់ទាំងស្រុង ពិសេសលម្អសម្រស់បំព្រងដោយរុក្ខជាតិពណ៌ខៀវខ្ចីរាប់រយដើម នោះគឺហាងកាហ្វេ Plants Café ។ គ្រាន់តែបោះជំហានដល់ក្នុងហាងភ្លាម កូនរុក្ខជាតិតូចធំហាក់បញ្ចេញសម្រស់ស្វាគមន៍យ៉ាងត្រជាក់ភ្នែកលាយឡំនឹងការដេគ័របែបសម័យទំនើបដែលធ្វើឲ្យអារម្មណ៍ស្រស់ស្រាយមួយរំពេច។ គ្រប់ជ្រុងនៃហាងកាហ្វេ និងលើតុនីមួយៗសុទ្ធតែមានដាក់តាំងដើមរុក្ខជាតិតូចធំប្រដេញគ្នាជាក្រុម បើសម្គាល់ឲ្យជាក់លាក់ទៅមានទាំងដើម ប៉ប្រក់ ប្រង់ ដំបងយក្ស ចន្ទន៍ភ្នំ ចេកមាស និងដើមរុក្ខជាតិជាច្រើនទៀតសរុបទៅមិនតិចជាង៦០ប្រភេទនោះទេ។ កាហ្វេបួនសាសន៍ ខ្មែរ ចិន ថៃ ឡាវ រួមបញ្ចូលគ្នាបង្កើតរសជាតិតែមួយគឺជាបទពិសោធន៍រសជាតិថ្មីដែលមិនគួររំលងពេលឆ្ពោះទៅដល់ហាងកាហ្វេនេះ។ ការពិតណាស់ រុក្ខជាតិមិនត្រឹមតែបង្កើតសោភ័ណភាពនោះទេ តែវាក៏ជួយកម្ចាត់ជាតិពុលក៏ដូចជាបន្សុទ្ធខ្យល់អាកាសស្រស់ថ្លាផងដែរ។ ក្រេបឱជារសកាហ្វេបណ្តើរ ធ្វើការជាមួយកុំព្យូទ័របណ្តើរ ហើយថែមទាំងបានគន់សម្រស់ធម្មជាតិខៀវខ្ចីទៀតនោះ ពិតជាធ្វើឲ្យអារម្មណ៍ស្រស់ស្រាយលាយឡំនឹងខ្យល់ដង្ហើមបរិសុទ្ធស្រស់ថ្លាគ្មានពីរ។ អូ! រុក្ខជាតិស្រស់ស្អាតទាំងនេះបើស្រឡាញ់មួយណា យើងក៏អាចបញ្ជាទិញផ្ទាល់បានផងដែរ។
4.Zoo Café
ពិតជាគួរឲ្យប្លែកនិងមិនធ្លាប់មានពីមុន ដែលសំខាន់ត្រូវចិត្តបំផុតសម្រាប់អ្នកស្រឡាញ់សត្វ ដោយសារតែសត្វប្លែកៗជាច្រើនប្រភេទដូចជា ស្វាតូចម៉ាមូសេត កណ្តុរជើងពីរ Gerbao កំប្រុក Prairi Dog បង្កួយ Chameleo កញ្ជ្រោង ឆ្កែមុខជ្រួញ Pug និងឆ្កែ Pomeranian ដែលមានរោមទន់ជាងគេជាដើម បានមកផ្តុំគ្នាដូចជាសួនសត្វនៅឯ Zoo Café ដែលអនុញ្ញាតឲ្យយើងប្រឡែងលេងឱបថើប និងថតរូបជាមួយប្រកបដោយក្តីស្រឡាញ់។ ក្រៅពីប្រលោមថ្នាក់ថ្នមសត្វដ៏គួរឲ្យក្នាញ់ហើយនោះ ទីនេះក៏មានបម្រើនូវភេសជ្ជៈកាហ្វេរសជាតិឈ្ងុយឆ្ងាញប្លែកមាត់ ក្នុងបរិយាកាសដេគ័របែបសិល្បៈនិយមជាមួយនឹងរូបសត្វនៅលើជញ្ជាំង និងកន្លែងអង្គុយ ធ្វើឲ្យអារម្មណ៍កាន់តែមានភាពស្និទ្ធស្នាលឡើង។ Zoo Café មានទីតាំងនៅក្រោយវិទ្យាល័យទួលទំពូង បើកទទួលស្វាគមន៍អ្នកស្រឡាញ់សត្វទាំងអស់ចាប់ពីម៉ោង ៧ព្រឹករហូតដល់ម៉ោង ៨យប់រៀងរាល់ថ្ងៃ។
5.Museum Café
វត្ថុបុរាណជាច្រើនដែលផលិតតាំងពីសម័យសង្គមរាស្រ្តនិយម ត្រូវបានតាំងយ៉ាងព្រោងព្រាតហើយគេឃើញសឹងតែមាននៅគ្រប់ទីកន្លែងនៅក្នុងហាងកាហ្វេលាក់កំបាំងមួយនៅខាងក្រោយវត្តមង្គលវ័ន ហៅស្វាយដង្គំ ដែលមានឈ្មោះថា ពិព័រណ៍កាហ្វេ។ នាឡិកាព្យួរជញ្ជាំងជាច្រើនត្រូវបានគេដាក់តាំងនៅពាសពេញពិដាននៃហាងកាហ្វេ ទូរសព្ទដៃចាស់ៗតាំងពីជំនាន់អាណានិគមបារាំងក៏មានវត្តមាននៅទីនេះ ចំណែកឯកាមេរ៉ាដែលមានអាយុតាំងពី ៣០ ទៅ ៤០ ឆ្នាំមុនជាច្រើនគ្រឿងក៏ត្រូវបានគេរៀបចំតាំងលម្អក្នុងទូរកញ្ចក់យ៉ាងមានរបៀបរៀបរយ ហើយមើលទៅហាក់ដូចជាសារមន្ទីរគ្រឿងអេឡិចត្រូនិចកាលពីសម័យបុរាណមួយដូច្នោះដែរ។ ដោយសារតែការស្រលាញ់និងមានឧបនិស្ស័យជាមួយនឹងគ្រឿងវត្ថុបុរាណទាំងអស់នេះហើយ ទើបធ្វើឲ្យម្ចាស់ហាងខំដើរប្រមែប្រមូលគ្រឿងទាំងអស់នេះនៅគ្រប់ទីកន្លែងក្នុងប្រទេសកម្ពុជាហើយខ្លះក៏បានបញ្ជាទិញនិងដេញថ្លៃមកពីក្រៅប្រទេសដើម្បីបង្កើតជាផ្ទាំងទស្សនីយភាពសម្រាប់កំដរចំណីចក្ខុរបស់ភ្ញៀវដែលបានមកពិសាកាហ្វេនៅហាងពិព័រណ៍កាហ្វេនេះផងដែរ។ ចាប់បើកទ្វារទទួលស្វាគមន៍ភ្ញៀវទាំងឡាយជារៀងរាល់ថ្ងៃ ចាប់ពីម៉ោង ៨ព្រឹក ដល់ ម៉ោង ៨យប់ជាមួយនឹងរសជាតិកាហ្វេដែលមានឱជារសឆ្ងាញ់ពិសាទៀតផង៕
Article by HEM SOKKHIM
