Sovrin
Sovrin
ពិធីករមានប្រជាប្រិយភាពរមែងតែមានភាពលេចធ្លោឬលក្ខណៈពិសេសដោយឡែកពីគ្នា ជាក់ស្តែងបើក្រឡេកមក Summer ដែលជាពិធីករ និងជាតារាសម្តែងមួយរូប លោកអាចចាត់ជាពិធីករលេចធ្លោចំណោមពិធីករវ័យក្មេងនៅកម្ពុជា ដោយលោកតែងបង្ហាញខ្លួនជាមួយស្ទីលស្លៀកពាក់ប្លែកៗឬបែបហ្វេហ្សិន ពិសេសរមែងបង្ហាញមុខកាន់កម្មវិធីពាណិជ្ជកម្មតូចធំនានាជាញឹកញយ។
មុនមានប្រជាប្រិយភាពដូចសព្វថ្ងៃ ដើមឡើយ Summer ឬមានឈ្មោះខ្មែរថា តារា ឧសភា បានផ្តើមចេញពីការប្រឡូកវិស័យចម្រៀង។ កាលពីឆ្នាំ ២០១៧ លោកបានចូលប្រឡងចម្រៀងក្នុងកម្មវិធីមួយឈ្មោះថា «កំពូលតារា» របស់ស្ថានីយទូរទស្សន៍ PNN គ្រានោះលោកជាប់បានត្រឹមវគ្គពាក់កណ្តាលផ្តាច់ព្រ័ត្រ ទោះយ៉ាងណាស្របទើបនឹងបញ្ចប់ការសិក្សា លោកក៏បានឆ្លៀតងាកមកបម្រើការងារក្រុមហ៊ុនកាន់ផ្នែកទីផ្សារមួយរយៈសិន។ ស្រឡាញ់សិល្បៈតាំងតែពីវ័យក្មេង រមែងចង់ឃើញខ្លួនបង្ហាញមុខលើកញ្ចក់ទូរទស្សន៍ មិនយូរប៉ុន្មានឱកាសក៏បានហុចមកដល់ លោកត្រូវបានជ្រើសរើសឲ្យសម្តែងបទចម្រៀងរបស់ លោក ហេង ពិទូ ចំណងជើង «ស្រឡាញ់គេតែម្នាក់ឯង» ដោយសម្តែងជាមួយ អ្នកនាង នៅ សូនីតា ដែលបទនេះមានការផ្ទុះខ្លាំងធ្វើឲ្យគេស្គាល់លោកចាប់តាំងពីពេលនោះមក។ ក្រោយមកលោកត្រូវបានខាងស្ថានីយទូរទស្សន៍អាស៊ីអាគេ្នយ៍ទំនាក់ទំនងធ្វើជាពិធីករកម្មវិធីប្រគំតន្ត្រី និងកម្មវិធីកម្សាន្ត រួចមកក៏បន្តមកកម្មវិធីនៅស្ថានីយទូរទស្សន៍ MyTV លុះក្រោយមកទៀតលោកបានផ្តោតជំហរមកធ្វើជាពិធីករឯករាជ្យកាន់ក្រុមចម្រៀងផ្ទាល់ខ្លួនសម្រាប់កម្មវិធីអាពាហ៍ពិពាហ៍ ក៏ដូចជាកម្មវិធីពាណិជ្ជកម្មតូចធំនានាដល់សព្វថ្ងៃ។
បើនិយាយពីសមិទ្ធផលការងារកន្លងមក ពិធីករវ័យ២៩ឆ្នាំ Summer បានធ្វើកម្មវិធីឲ្យក្រុមហ៊ុនម៉ាកយីហោធំៗជាច្រើនដូចជា ស្រាបៀរ Vattana, ស្រាបៀរ Carlsberg, ស្រាបៀរ ABC, Pepsi, DKSH, ធនាគារ Prince, ធនាគារ Woori, ធនាគារ Wing និងសណ្ឋាគារ Rosewood Phnom Penh។ នេះមិនរាប់បញ្ចូលកម្មវិធីសម្ពោធ កម្មវិធីកម្សាន្ត និងកម្មវិធីផ្លូវការជាច្រើនទៀតផងនោះ។ ថ្វីដ្បិតមមាញឹកនឹងអាជីពជាពិធីករ ទន្ទឹមគ្នានេះលោកក៏ឆ្លៀតប្រឡូកការងារសម្តែងផងដែរ ជាក់ស្តែង លោកបានថតរឿងខ្លីមួយចំនួនដូចជា រឿង «កក់សំបុត្របេះដូង» របស់ EVA AIR និង រឿង «Hey you! Cheers ខ្លះទៅ» របស់ក្រុមហ៊ុនស្រាបៀរ Vattanac ជាដើម។
ជជីកសួរថាតើរវាងអាជីពសម្តែង និងអាជីពពិធីករមួយណាលោកចូលចិត្តជាង? ឆ្លើយទាំងមិនអឹមអៀម លោកថាស្រឡាញ់អាជីពជាពិធីករជាង។ ចុះតើអ្វីទៅជាភាពលេចធ្លោដោយឡែករបស់លោក? លោកថា លោកមានភាពប្លែកពីគេទៅលើការស្លៀកពាក់ ហ្វេហ្សិនប្លែកតែមិនមែនចម្លែក ភាគច្រើនលោកស្លៀកពាក់ពីកម្មវិធីមួយទៅកម្មវិធីមួយមិនឲ្យជាន់គ្នាឡើយ “មួយកម្មវិធីដឹងតែមួយឈុត បើទោះគេជួលខ្ញុំបីកម្មវិធីក្នុងថ្ងៃតែមួយកន្លែងតែមួយក៏ខ្ញុំត្រូវតែប្រើឈុតមិនឲ្យដដែលដែរ អាចថាខ្ញុំលេងខ្លួនប្លែកតែមិនឲ្យចាកពីកម្មវិធីគេទេ បុរាណដឹងបុរាណ សម័យដឹងសម័យ។”
លោកបានបង្ហើបឲ្យដឹងពីការត្រៀមខ្លួនសម្រាប់ការងារយ៉ាងដូច្នេះ “មុនចេញកម្មវិធី ខ្ញុំត្រូវដឹងថាកម្មវិធីនោះជាកម្មវិធីអ្វី ខ្ញុំធ្វើឲ្យខាងណា ព្រោះដើម្បីងាយស្រួលសម្រាប់ខ្ញុំរៀបចំសម្លៀកបំពាក់ឲ្យត្រូវនឹង Concept កម្មវិធីរបស់គេ និងពណ៌នៃម៉ាកយីហោរបស់គេ ដែលសំខាន់ទៀតនោះត្រូវមើល Script នៃកម្មវិធីធ្វើយ៉ាងណាឲ្យដឹងថាកម្មវិធីរបស់គេធ្វើអំពីអ្វីខ្លះ និងមួយចុងក្រោយគឺត្រៀមការនិយាយបត់បែនទៅតាមកម្មវិធីជាក់ស្តែង។” ជាពិសេស ក្នុងនាមជាពិធីករអាជីពលោកប្រកាន់ខ្ជាប់ឥរិយាបថ មានទំនាក់ទំនងល្អជាមួយក្រុមការងារ ក៏ដូចជាមនុស្សជុំវិញខ្លួន គោរពពេលវេលា និងមានទំនួលខុសត្រូវខ្ពស់។
បោះជំហានលើវិថីសិល្បៈរយៈពេលប្រមាណ៥ឆ្នាំមក ពិធីករកម្ពស់ ១,៧៣ ម៉ែត្រ Summer ថាលោកទទួលបានបទពិសោធន៍ច្រើនពីអាជីពមួយនេះ “អាជីពពិធីករបានបង្រៀនខ្ញុំច្រើនពីអ្វីដែលគួរនិយាយ និងអ្វីដែលមិនគួរនិយាយ វាអាចឲ្យខ្ញុំចេះរៀបចំអត្តចរិតបត់បែនទៅតាមកម្មវិធីតូចធំឬផ្លូវការ លើសពីនេះវាបង្រៀនខ្ញុំឲ្យស្គាល់មនុស្សច្រើនប្រភេទ អ្នកខ្លះយើងមិនស្គាល់សោះអាចមានឱកាសបានរួមការងារជាមួយ ហើយការស្គាល់គ្នានេះហើយនឹងធ្វើឲ្យយើងមានឱកាសកាន់តែច្រើនផងដែរ។ ខ្ញុំពិតជាសប្បាយចិត្តដែលខ្ញុំបានយកភាសាដែលបានរៀនមកប្រើប្រាស់នៅក្នុងអាជីពរបស់ខ្ញុំ ហើយថែមទាំងបានចំណូលពីវាទៀតផង។” បើនិយាយពីកម្រិតវប្បធម៌របស់ពិធីករមានស្រុកកំណើតនៅទីក្រុងភ្នំពេញ និងជាកូនប្រុសច្បងនៃប្អូនប្រុសម្នាក់រូបនេះក៏មិនធម្មតាដែរ លោកបានបញ្ចប់បរិញ្ញាបត្រផ្នែកអប់រំ(ភាសាអង់គ្លេស)នៅវិទ្យាស្ថានភាសាបរទេស IFL ឆ្នាំ ២០១៥ និងបរិញ្ញាបត្រផ្នែករដ្ឋបាលធុរកិច្ចនៅសាកលវិទ្យាល័យបញ្ញាសាស្ត្រកម្ពុជាឆ្នាំ ២០១៧។
លោកបាននិយាយដែរថា នៅថ្ងៃខាងមុខបើមានពេល មានឱកាស លោកក៏ចង់ត្រឡប់ទៅធ្វើជាពិធីករប្រចាំស្ថានីយទូរទស្សន៍ណាមួយផងដែរ។ លោកថែមទាំងចែករំលែកសម្រាប់អ្នកមានក្តីស្រមៃចង់ក្លាយជាពិធីករដែរថា “បើមានក្តីស្រមៃ សូមកុំបោះបង់ សូមបន្តធ្វើវារហូតដល់ជោគជ័យនៅថ្ងៃណាមួយ”៕
Article by HEM SOKKHIM
