SOVRIN Magazine

«Grace Café» មិនត្រឹមតែជាហាងកាហ្វេនោះទេ តែជាកន្លែងដែលផ្ដល់ឱ្យអ្នកនូវសុខភាពល្អប្រកបដោយសុវត្ថិភាព

NEWS one year ago

ហាងកាហ្វេជាច្រើនកន្លែងកំពុងមានវត្តមានស្ទើរតែគ្រប់ច្រកល្ហកទាំងក្នុងរាជធានីភ្នំពេញ ឬតាមបណ្តាខេត្ត ជាពិសេស ស្ថិតក្នុងតំបន់ទេសចរណ៍ភាគច្រើនតែងមានបម្រើនូវភេសជ្ជៈ ឬម្ហូបអាហារ ច្រើនបែបតាមតម្រូវការរបស់អតិថិជន។ ស្របពេលដែលស្ថាបនិក ជាច្រើនរូបនៃហាងទាំងនោះកំពុងសម្លឹងឃើញនូវផលប្រយោជន៍ដែលពុំគិតពីសុខភាពរបស់ភ្ញៀវ នេះជាឱកាសដ៏ល្អបំផុតសម្រាប់ស្ថាបនិកមួយរូបនៃហាងកាហ្វេមួយកន្លែងនាទីក្រុងសៀមរាបបានប្រកាន់ភ្ជាប់នូវទស្សនៈវិស័យអំពីសុខភាពយ៉ាងខ្ជាប់ខ្ជួន ច្រើនជាងប្រាក់ចំណេញ។

បើយើងធ្វើដំណើរចេញពីមន្ទីរពេទ្យគុន្ធបុប្ផា តាមបណ្ដោយដងវិថីព្រះសីហមុនី ឆ្ពោះទៅមហាវិថីស៊ីវុត្ថាប្រហែល៥០០ម៉ែត្រ អ្នកនឹងបានឃើញហាងកាហ្វេមួយនៅខាងស្ដាំដៃ ដែលហ៊ុមព័ទ្ធដោយកញ្ចាក់ភ្លឺថ្លា អមដោយការតុបតែងបែបធម្មជាតិពណ៌បែតងខ្ចីបានទាក់ចិត្តអ្នកឆ្លងកាត់ទីនោះឱ្យមកភ្លក់នូវរសជាតិកាហ្វេដ៏ឈ្ងុយឆ្ងាញ់ពីហាងកាហ្វេដែលមានឈ្មោះថា «Grace Café» ដែលទើបតែបើកដំណើរការកាលពីថ្ងៃទី១ ខែមិថុនា កន្លងទៅ។ ទន្ទឹមនឹងនេះ សូវរីន បានជំនួបជាមួយនឹងប្រធានផ្នែកលក់ និងទីផ្សារអ្នកស្រី គុណ ថាណែត បានឱ្យដឹងពីអត្ថន័យនៃនិមិត្តសញ្ញាយ៉ាងដូចច្នេះផងដែរថា “កាហ្វេ និងម្ហូបនីមួយៗបម្រើនៅទីនេះសុទ្ធតែត្រូវបានចម្អិនយ៉ាងយកចិត្តទុកដាក់ទៅលើគ្រឿងផ្សំ ដោយគិតគូរអំពីសុខភាពជាចម្បង ប្រៀបដូចជាសត្វកន្ទុំរុយ ដែលជាសត្វមានតុល្យភាពដោយមានស្លាបត្រង់ស្មើគ្នា ហេតុនេះទើបខ្ញុំសម្រេចចិត្តជ្រើសរើសសត្វកន្ទុំរុយជារូបនៃស្លាកយីហោតែម្តង។” អ្នកស្រីក៏បានឱ្យដឹងដែរថា បន្លែដែលត្រូវបានយកមកចម្អិនជាមុខម្ហូបនីមួយៗ សុទ្ធតែជាបន្លែដែលត្រូវបានដាំដោយប្រជាកសិករដែលរស់នៅតំបន់នោះផ្ទាល់តែម្ដង មានន័យថាទីនេះមិនត្រឹមតែជាហាងកាហ្វេតែប៉ុណ្ណោះនោះទេ ប៉ុន្តែក៏មានបម្រើម្ហូបអាហារបែបសុខភាពដែលគ្មានជាតិគីមី ផ្គួបផ្សំជាមួយបរិយាកាសបរិសុទ្ធទាក់ចិត្តភ្ញៀវជាតិ និងអន្តរជាតិជិតឆ្ងាយពុំរំលងហាងកាហ្វេ «Grace Café» សោះឡើយ។

ទិដ្ឋភាពដ៏សែនមនោរម្យរបស់ហាងកាហ្វេនេះ មិនត្រឹមតែជាផ្នែកមួយនៃការទាក់ទាញចិត្តភ្ញៀវប៉ុណ្ណោះទេ តែសម្រាប់ភេសជ្ជៈនីមួយៗដែលបានធ្វើឡើងពីអ្នកជំនាញពិតជាមានឱជារសឈ្ងុយឆ្ងាញ់ជាប់ចិត្ត និងមិនអាចបំភ្លេចបានឡើយ។ បើទោះបីជាហាងកាហ្វេនេះ ទើបតែមានវត្តមានក៏ពិតមែន ប៉ុន្តែសម្ទុះនៃការគាំទ្រមានចំនួនលើសពីការរំពឹងទុកទៅទៀត តួយ៉ាង អតិថិជនមានការស្ងើចសរសើរពុំដាច់ពីមាត់អំពីការតុបតែង សេវាកម្មបម្រើអតិថិជន រួមទាំងរសជាតិនៃអាហារ និងភេសជ្ជៈប្រចាំហាងនេះផងដែរ។ ជាក់ស្ដែង កាហ្វេឡាតេ ដែលមានបីរសជាតិ ដូចជា Turmeric Latte ដែលមានអត្ថប្រយោជន៍ក្នុងការជួយកាត់បន្ថយការឈឺចង្កេះ ឈឺតាមសន្លាក់ កាត់បន្ថយខ្លាញ់ក្នុងសរសៃឈាម ពង្រឹងសុខភាពក្រលៀន និងជំនួយភ្នែក រីឯ Spirulina Latte សម្បូរសារធាតុបំប៉នដល់រាងកាយ បង្ការជំងឺមហារីក កាត់បន្ថយសម្ពាធឈាម និងជួយឱ្យសាច់ដុំរឹងមាំ ចំណែកឯ Charcoal Latte កាត់បន្ថយជាតិពុលក្នុងខ្លួន ជំនួយសម្រស់ឱ្យក្មេងជាងវ័យ និងជួយដល់ការរំលាយអាហារផងដែរ។ លើសពីកាហ្វេ នៅទីនោះក៏មានភេសជ្ជៈបែបបន្លែផ្លែឈើដូចជា Golden Juice, Detox និង Beet Down សុទ្ធតែជាប្រភេទភេសជ្ជៈប្រចាំហាង «Grace Café» ដែលមានរសជាតិខុសប្លែកពីហាងកាហ្វេដទៃ ព្រមជាមួយនឹងម្ហូប Organic vegetable salad, Three flavored fish និង Fried salmon with eggplant ដោយភេសជ្ជៈ និងម្ហូបនីមួយៗប្រើប្រាស់បន្លែ ឬផ្លែឈើធម្មជាតិក្នុងស្រុក និងខ្លះទៀតយកមកពីបរទេស ដើម្បីបង្កើតជារូបមន្តដោយខ្លួនឯងតែម្ដង។ ជាមួយគ្នានេះ លោក អ៊ុន ស៊ីនណារ៉ុង ជាមេចុងភៅបានបញ្ជាក់យ៉ាងដូច្នេះ “ភេសជ្ជៈ និងម្ហូបដែលធ្វើពីបន្លែផ្លែឈើទាំងអស់ត្រូវបានសម្រិតសម្រាំងឡើងយ៉ាងយកចិត្តទុកដាក់ ដោយជ្រើសរើសតែប្រភេទសរីរាង្គ ឬអាចនិយាយថាធម្មជាតិពិតៗដែលមានគុណភាព និងគ្មានសារធាតុគីមី។”

ដោយឡែក «Grace Café» មិនត្រឹមតែជាហាងកាហ្វេដែលអាចផ្ដល់នូវបទពិសោធន៍ថ្មីៗដល់អ្នកប៉ុណ្ណោះទេ ប៉ុន្តែទីនេះក៏ជាកន្លែងមួយសម្រាប់ឱ្យលោកអ្នកហ្វឹកហាត់ខ្លួនក្នុងការកាត់បន្ថយនៃការបរិភោគអាហារដែលមានជាតិប្រេងលើសកម្រិត ឬប្រើគឿងផ្សំដិត។ ពោលគ្រប់មុខម្ហូបនៅទីនេះគឺមិនមានរសជាតិប្រៃ ឬផ្អែមពេកនោះទេ ជាពិសេស វាក៏ជាផ្នែកមួយធ្វើឱ្យអ្នកទទួលបានសុខភាពល្អ។ មិនតែប៉ុណ្ណោះ ហាងកាហ្វេនេះ បានលើកទឹកចិត្ត និងជំរុញសម្រាប់អ្នកពុំទាន់ទម្លាប់បរិភោគអាហារដែលមានរសជាតិសាបឱ្យមានការព្យាយាមរហូតដល់ក្លាយជាទម្លាប់ ដើម្បីសុខភាពអ្នកទទួលទាន។

«Grace Café» ស័ក្តិសមបំផុតសម្រាប់សិស្សានុសិស្ស អ្នកធ្វើការ ឬអ្នកជំនួញគ្រប់រូបអាចពិភាក្សាការងារ ដោយពុំមានភាពតានតឹងឡើយក៏ព្រោះតែបរិយាកាសនៅទីនោះនឹងជំរុញឱ្យការគិតរបស់អ្នកមានការរីកចម្រើន និងស្រស់ស្រាយជាមិនខាន។ គួរបញ្ជាក់ថា ហាងកាហ្វេនេះបើកទទួលស្វាគមន៍អតិថិជនជារៀងរាល់ថ្ងៃចាប់ពីម៉ោង ៧ព្រឹករហូតដល់ម៉ោង ៨យប់៕

Article by NI CHANNIKA

SUGGESTIONS