Sovrin
Sovrin
យុវតី គា ឆរីតា មានអាយុ ១៥ឆ្នាំ ជាសិស្សកំពុងសិក្សាថ្នាក់ទី១០ នៃសាលាឯកជនមួយកន្លែងក្នុងរាជធានីភ្នំពេញ។ ថ្មីៗនេះ ឆរីតា បានទទួលជ័យលាភីជាសិស្សឆ្នើមលេខ១ផ្នែកគណិតវិទ្យា ដោយការប្រកួតប្រជែងក្នុងចំណោមសិស្សមកពី៤២ប្រទេសលើសកលលោក។
មុនឈានដល់ការទទួលបានជ័យលាភីជាសិស្សឆ្នើមលេខ១នេះ មែនទែនទៅ ឆរីតា ធ្លាប់បានចូលរួមប្រកួតជាសិស្សពូកែទាំងថ្នាក់ជាតិ និងអន្តរជាតិជាច្រើនលើករួចមកហើយ ដោយក្នុងរយៈពេលជាង១ឆ្នាំប៉ុណ្ណោះ សិស្សឆ្នើមរូបនេះ អាចទទួលបានមេដាយ និងពានរង្វាន់រហូតដល់ទៅ៤០គ្រឿងជាងឯណោះ។ តួយ៉ាង ការប្រឡងជាសិស្សពូកែទូទាំងរាជធានីបានលេខ៣ ប្រឡង Math kangaroo បានលេខ១ និងមេដាយមាស ការប្រឡង UCMAS ទទួលបានជ័យលាភីជាច្រើនរហូតទទួលបានអាហារូបករណ៍ទៅប្រឡងនៅប្រទេសម៉ាឡេស៊ីកម្រិតអន្តរជាតិ ដែលទទួលបានចំណាត់ថ្នាក់លេខ១ រួមទាំងការប្រកួតជាច្រើនទៀតជាមួយលទ្ធផលដ៏ល្អផងដែរ។
ក្នុងការប្រឡងទទួលបានជ័យលាភីនេះ តើ ឆរីតា បានរៀនត្រៀមអ្វីខ្លះមុនពេលប្រឡង? យុវតីរូបនេះ ឆ្លើយតបទាំងមិនលាក់លៀម “ខ្ញុំមិនបានរៀនត្រៀម ឬរៀនធ្វើលំហាត់អ្វីសម្រាប់ការប្រឡងនោះទេ តែគឺខ្ញុំរៀនត្រៀមជាប្រចាំទៅលើការសិក្សាទូទៅ ទោះបីមិនមានការប្រឡងក៏ដោយ ដូចជាការៀនធ្វើលំហាត់គណិតវិទ្យាអូឡាំព្យាពីវិញ្ញាសាចាស់ៗចម្រុះ ការសិក្សាលើទម្រង់លំហាត់ និងការដោះស្រាយ ការស្រាវជ្រាវផ្សេងៗជាដើម។”
តើការប្រឹងប្រែងរៀនរហូតក្លាយជាសិស្សពូកែបែបនេះ តើមានអ្វីដែលជាឧបសគ្គសម្រាប់ប្អូនដែរឬទេ? “ការលំបាកតែងតែមានសម្រាប់ខ្ញុំ។ ខ្ញុំទទួលស្គាល់ថាលំហាត់គណិតវិទ្យាអូឡាំព្យាឬលំហាត់ដែលសាលាមិនធ្លាប់បានបង្រៀនគឺពិតជាលំបាកក្នុងការដោះស្រាយ។ ខ្ញុំក៏ធ្លាប់បាក់ទឹកចិត្តរាល់ពេលដោះស្រាយមិនចេញ តែពេលនោះខ្ញុំតែងគិតដល់ចំណុចចាប់ផ្តើមដែលខ្ញុំខំប្រឹង ទើបខ្ញុំមានកម្លាំងចិត្តបន្តទៀត ហើយព្យាយាមរកដំណោះស្រាយ សួរលោកគ្រូអ្នកគ្រូ ឬសិក្សាស្រាវជ្រាវបន្ថែមរហូតអាចដោះស្រាយបាន។” សិស្សឆ្នើមរូបនេះបានលើកឡើង។
នាពេលខាងមុខនេះ គា ឆរីតា ក៏នឹងត្រៀមចេញទៅប្រកួតជាច្រើនទៀត រួមមាន ការប្រកួតបញ្ញាវន្តអន្តរជាតិនៅសហរដ្ឋអាមេរិកនៅខែ១១ ឆ្នាំ២០២៣ ការប្រឡង UCMAS នៅប្រទេសម៉ាឡេស៊ីនៅខែ១២ បន្ទាប់មកត្រូវបន្តទៅប្រកួតអូឡាំព្យា STEAM AHEAD នៅប្រទេសឥណ្ឌូនេស៊ី និងកម្មវិធីប្រកួតថ្នាក់ជាតិ និងអន្តរជាតិជាច្រើនទៀត។
តាមរយៈការបោះជំហានចូលរួមប្រកួតកន្លងមក ឆរីតា ក៏បានចែករំលែកគន្លឹះរៀនសូត្រដែរថា “ក្នុងនាមជាសិស្សពូកែមួយរូប ខ្ញុំមិនគិតថាយើងត្រូវតែរៀនរហូតនោះទេ ទោះបីជាការរៀនជាចំណុចមួយដ៏សំខាន់ដែលជួយអភិវឌ្ឍចំណេះដឹង តែពេលខ្លះយើងក៏ត្រូវមានពេលសម្រាប់ខ្លួនឯង ដកឃ្លាពីអ្វីដែលយើងបានខិតខំ ដើម្បីបន្ធូរអារម្មណ៍កុំឱ្យមានភាពតានតឹងឬមានសម្ពាធ។ តែត្រូវតែរៀនតាមផែនការដែលយើងបានកំណត់សម្រាប់ខ្លួនឯង ថាម៉ោងណាយើងត្រូវតែរៀន ម៉ោងណាយើងសម្រាក ទៅតាមកាលវិភាគឱ្យបានទៀតទាត់។ ហើយគន្លឹះដែលសំខាន់នោះគឺយើងត្រូវពេញចិត្តនូវអ្វីដែលយើងកំពុងធ្វើ បើយើងស្រលាញ់មុខវិជ្ជាណាមួយយើងត្រូវរៀនពីមុខវិជ្ជានោះ ទោះបីមិនចេះស្ទាត់ តែបើយើងព្យាយាមមិនបោះបង់ រៀនមូលដ្ឋានគ្រឹះនៃមុខវិជ្ជានោះ វាមានភាពងាយស្រួលសម្រាប់យើងនៅពេលណាមួយមិនខាន”៕
Article by SOUNG SOKSAN
