Sovrin
Sovrin
ខុសពីហាងកាហ្វេដទៃដែលមានការរចនាប្លែកៗ ស៊ីវិល័យ និងពោរពេញទៅដោយទំនោរនិយមខ្ពស់ «ហាងកាហ្វេមួយ» ជាកាហ្វេស្ថិតនៅក្នុងប្លុកនៃបុរីប៉េងហ៊ួតបឹងស្នោរ ច្បារអំពៅ រាជធានីភ្នំពេញដែលមានការរចនាបែបសាមញ្ញ អេឡេហ្គង់ និងពោរពេញទៅដោយបរិយាកាសស្រស់បំព្រងបានទាក់ចិត្តអតិថិជនស្ទើរតែគ្រប់មជ្ឈដ្ឋានឲ្យមកកាន់ទីនេះ ដើម្បីទទួលទាននូវរសជាតិដ៏ឆ្ងាញ់ពិសាពីកាហ្វេដែលបម្រើនូវទីនេះ។
ជំនួបពិភាក្សាជាមួយនឹងស្ថាបនិក និងសហស្ថាបនិកនៃហាង «កាហ្វេមួយ» លោក សេង ពិសិដ្ឋ និងលោក ណុប កក្កដា ដែលជាអតីតជ័យលាភីនៃការប្រកួតប្រជែងឆុងកាហ្វេថ្នាក់ជាតិបានឲ្យដឹងផងដែរថា «កាហ្វេមួយ» មានវត្តមានក្នុងរាជធានីភ្នំពេញប្រមាណជាងជិត២ឆ្នាំមកហើយ រីឯ «កាហ្វេមួយ» ជាឈ្មោះដែលតំណាងឲ្យទំនៀមទម្លាប់នៃការប្រើប្រាស់សម្តីសំដៅក្នុងការរស់នៅប្រចាំរបស់ប្រជាជនខ្មែរច្រើននិយមប្រើប្រាស់ពាក្យថា «មួយ» តួយ៉ាង សុំទឹកមួយ កាហ្វេមួយ ជាដើម។ ទន្ទឹមនឹងកិច្ចពិភាក្សា លោក សេង ពិសិដ្ឋ ដែលជាស្ថាបនិកនៃហាងកាហ្វេនេះបានបង្ហើបពីជីវប្រវត្តិរបស់ខ្លួនត្រួតៗយ៉ាងដូច្នេះដែរថា នាអំឡុងឆ្នាំ២០១៥ លោកគ្រាន់តែជាអ្នកលក់កាហ្វេម្នាក់តាមចិញ្ចើមផ្លូវតែប៉ុណ្ណោះ លោកបានបញ្ជាក់ដូច្នេះថា «នាអំឡុងពេលនោះ កាហ្វេកំពុងនិយមខ្លាំង ជាពិសេស កាហ្វេតាមរទេះដែលច្រើននិយមលក់នៅតាមដងផ្លូវ វត្តបទុមវតីជាដើម ជាពិសេស កាហ្វេរទេះ ខ្ញុំឃើញគេលក់ដាច់ និងចំណេញណាស់ ខ្ញុំក៏លក់តាមគេដែរ ប៉ុន្តែខ្ញុំគ្មានចេះអីទេ»។ នាអំឡុងឆ្នាំ២០១៦ អ្នកបន្ទាយមានជ័យម្នាក់នេះបានផ្លាស់ប្តូរលំនៅដ្ឋានរបស់ខ្លួនពីរាជធានីភ្នំពេញទៅកាន់ខេត្តសៀមរាប ដើម្បីស្វែងរកនូវបទពិសោធន៍ថ្មីៗបន្តទៀត តួយ៉ាង លោកជាអតីតបុគ្គលិកក្រៅម៉ោងម្នាក់នៃហាងកាហ្វេឯកជនមួយកន្លែង ដោយការងារនេះពុំសូវជាផ្តល់នូវចំណូល និងមានស្ថេរភាពយូរលោកបានចាប់ផ្តើមសិក្សាពីការឆុងកាហ្វេដោយម៉ាស៊ីនលើកទី១នាពាក់កណ្តាលឆ្នាំ២០១៦ បន្ទាប់មកនាអំឡុងឆ្នាំ២០១៧ ស្ថាបនិករូបនេះបានចូលរួមការប្រកួតប្រជែងឆុងកាហ្វេលំដាប់ថ្នាក់ជាតិ និងបានឈានមកដល់វគ្គផ្តាច់ព្រ័ត្ត រហូតមកដល់អំឡុងឆ្នាំ២០១៨ លោក ពិសិដ្ឋ បានទទួលនូវជ័យលាភីពាន់រង្វាន់ក្នុងកម្មវិធីប្រកួតប្រជែងឆុងកាហ្វេលំដាប់ថ្នាក់ជាតិផងដែរ។
លោក សេង ពិសិដ្ឋ
ចំណែកឯសហស្ថាបនិកនៃហាងកាហ្វេមួយ លោក ណុប កក្កដា ជាអ្នកខេត្តបាត់ដំបង ដែលជាអតីតនិស្សិតនៃតិចណូបាត់ដំបងវិញ មិនខុសពី លោក ពិសិដ្ឋ ប៉ុន្មាននោះដែរ តួយ៉ាង លោក កក្កដា ជាអតីតសន្តិសុខម្នាក់នៃក្រុមហ៊ុនឯកជនមួយកន្លែងដែលការងារនេះអាចធ្វើឲ្យលោកអាចរកប្រាក់កម្រៃសម្រាប់ផ្គត់ផ្គង់ការសិក្សា សម្ភារប្រើប្រាស់ចំបាច់មួយចំនួន ដែលមិនប៉ះពាល់ដល់ការសិក្សារបស់លោក។ ទន្ទឹមនឹងនេះផងដែរ សហស្ថាបនិកវ័យ២៥ឆ្នាំម្នាក់នេះបានបង្ហាញឲ្យដឹងផងដែរថា ដោយសារតែជីវភាពមិនសូវធូរធារ និងតម្រូវការកាន់តែខ្ពស់បានធ្វើឲ្យលោកចាប់ផ្តើមស្វែងរកការងារមួយកន្លែងទៀត ដូច្នេះមានន័យថា ក្នុងមួយថ្ងៃលោកត្រូវធ្វើការចំនួនពីរផ្នែកពោលមួយផ្នែកជាអ្នកធ្វើក្នុងហាងកាហ្វេមួយកន្លែង និងមួយផ្នែកទៀតជាសន្តិសុខ។ ថ្វីដ្បិតតែ បម្រើការងារពីរវេណក្នុងមួយថ្ងៃក៏ដោយ ប៉ុន្តែសហស្ថាបនិកម្នាក់នេះនៅតែមិនរួញរានូវគោលដៅរបស់ខ្លួនឡើយ។ ជាក់ស្តែង លោក កក្កដា ជាអ្នកឆុងកាហ្វេម្នាក់ដែលមានក្តីប្រាថ្នាចូលរួមការប្រកួតប្រជែងលំដាប់ថ្នាក់ជាតិនារាជធានីភ្នំពេញ ដើម្បីទទួលយកបទពិសោធន៍ថ្មីៗទាក់ទងនឹងការឆុងកាហ្វេបន្ថែមនាអំឡុងឆ្នាំ២០១៦ មកម៉្លេះ ប៉ុន្តែ លោកត្រូវបានខកខានការចូលរួមប្រកួតនេះ រហូតមកដល់ឆ្នាំ២០១៧ កម្មវិធីដដែលបានបង្ហាញខ្លួនសារជាថ្មីម្តងទៀតដែលជាឱកាសដ៏អំណោយផលសម្រាប់លោកក្នុងការបង្ហាញទេពកោសល្យ និងសមត្ថភាពរបស់ខ្លួនទៅកាន់ទស្សនិកជនគ្រប់មជ្ឈដ្ឋាន។ សហស្ថាបនិកម្នាក់នេះ បានលើកឡើងថា «រាល់ការងារដែលខ្ញុំធ្វើទាំងអស់សមាជិកគ្រួសារពុំសូវគាំទ្រប៉ុន្មាននោះទេ ទោះបីជាខ្ញុំមិនបានស្នាក់នៅជាមួយគាត់ក៏ដោយ ដូចដែរគាត់បាននិយាយថា រៀនមេកានិចសោះ ទៅឆុងកាហ្វេទៅវិញ ហើយនាពេលនោះដែរធ្វើឲ្យខ្ញុំមានអារម្មណ៍ថាគ្មាននរណាម្នាក់គាំទ្រនូវអ្វីដែលខ្ញុំកំពុងតែធ្វើនោះទេ ប៉ុន្តែម្តាយធម៌របស់ខ្ញុំគាត់ជំរុញទឹកចិត្តខ្ញុំឲ្យធ្វើអ្វីទៅតាមដែលខ្លួនស្រឡាញ់ ហើយនេះបានធ្វើឲ្យខ្ញុំរឹតតែចង់ធ្វើអ្វីដែលខ្ញុំស្រឡាញ់។» ទន្ទឹមនឹងនេះ លោក ក៏បានបន្តផងដែរថា «នៅក្នុងឧបសគ្គសុទ្ធសឹងតែជាឱកាសដែលអាចធ្វើឲ្យយើងក្លាយជាមនុស្សរឹងមាំជាងមុន គិតច្រើនជាងមុន និងមានដំណោះស្រាយជាងមុន ហេតុនេះប្រសិនបើយើងស្រឡាញ់នូវអ្វីមួយ យើងគួរតែធ្វើវា ទោះបីវាលំបាកបន្តិចមែន ប៉ុន្តែភាពលំបាកទាំងអស់នោះនឹងធ្វើឲ្យខ្លួនយើងអភិវឌ្ឍ និងផលដ៏ល្អមួយ»។
លោក ណុប កក្កដា
គួរជម្រាបផងដែរថា ស្ថាបនិក និងសហស្ថាបនិកនៃហាង «កាហ្វេមួយ» ជាអតីតនៃបេក្ខជនជ័យលាភីនៃកម្មវិធីការប្រកួតឆុងកាហ្វេថ្នាក់ជាតិ ហើយអ្នកទាំងពីរបានចាប់ផ្តើមអាជីវកម្មរបស់ខ្លួននាអំឡុងឆ្នាំ២០១៨ មិនត្រឹមតែប៉ុណ្ណោះ អ្នកទាំងពីរមិនត្រឹមតែជាម្ចាស់នៃហាង «កាហ្វេមួយ» នោះទេ ប៉ុន្តែក៏ជាម្ចាស់នៃហាងកាហ្វេមួយស្ថិតនៅក្នុងខេត្តសៀមរាបផងដែរ៕
Article by PAN SIVLY
