សួស្តីខែថ្មី ខែសីហា ឆ្នាំ២០២១! សម្រាប់ខែនេះ ទោះបីប្រទេសយើងនៅតែស្ថិតក្នុងបរិបទកូវីដ១៩ ក៏ដោយ ក៏សូវរីននៅតែព្យាយាមស្វែងរកឈុតហ្វេហ្សិនបែបប្រណិតទាន់សម័យមកបង្អួតខ្សែចក្ខុមិត្តអ្នកអានមិនខុសពីលេខចេញផ្សាយសព្វមួយដងនោះទេ បង្ហាញដោយនារីម៉ូដែលដ៏ស្រស់ឆើតឆាយ បង្កើតបានជាផ្ទាំងទស្សនីយភាពស័ក្តិសមឥតខ្ចោះរំលេចឡើងលើក្របមុខប្រចាំខែ។
ចំពោះលេខខែសីហារបស់យើងខ្ញុំ ប្រិយមិត្តទាំងឡាយនឹងបានឈ្វេងយល់អំពីបេសកកម្មនៃការអភិរក្សរបាំព្រះរាជទ្រព្យ ឬរបាំក្បាច់បុរាណខ្មែរ ក្នុងអន្តរកាលនៃការរាតត្បាតនៃជំងឺកូវីដ១៩ នៅក្នុងប្រទេសកម្ពុជាយើងនាពេលបច្ចុប្បន្ន តាមរយៈវត្តមាននៃសាលារបាំបុប្ផាទេវី ដែលទើបតែត្រូវបានបង្កើតឡើង ក្រោយពេលដែលសម្តេចព្រះរាជបុត្រី ព្រះរៀម នរោត្តម បុប្ផាទេវី ទេពនាដវដ្តីឯក ទ្រង់សោយពិរាល័យ។ ទន្ទឹមនឹងនេះ មិត្តអ្នកអាននឹងបានស្គាល់ជីវប្រវត្តិរបស់កូនខ្មែរមួយរូបដែលជាស្ថាបនិកឈុតហែលទឹកយីហោ “Fly Heart Fit” គួបផ្សំនឹងការចែករំលែកចំណេះដឹងសុខភាព និងកីឡាក្នុងលេខតែមួយព្រមជាមួយគ្នាតែម្តង។ សិល្បករក្នុងជំនាញដទៃទៀត រួមមាន អក្សរសិល្ប៍ ចម្រៀង និងគំនូរជាដើម ក៏នឹងចូលខ្លួនមកលាតត្រដាងអំពីវិថីសិល្បៈរបស់ខ្លួនប្រកបដោយបទពិសោធន៍ និងតិកនិកគួរឲ្យចាប់អារម្មណ៍ដែលលោកអ្នកអាចនឹងនឹកស្មានមិនដល់។
ទោះបីជាយ៉ាងណាក៏ដោយ ក៏យើងមិនអាចរំលងចោលនូវទំព័រដំណើរទស្សនាចរណ៍ដែលផ្តោតទៅលើទេសចរណ៍បែបឡើងភ្នំកម្រិតទាប ងាយៗសម្រាប់ប្រជាជនក្នុងស្រុកគ្រប់ស្រទាប់វណ្ណៈដែលប្រាថ្នាចង់គយគន់ទេសភាពធម្មជាតិ និងស្រូបយកខ្យល់អាកាសបរិសុទ្ធ ដោយមិនចាំបាច់ចំណាយថាមពលច្រើនហួសប្រមាណ។ ដោយឡែក សូវរីន បានលើកយកនូវជម្រើសអាហារខ្មែរពិសេសពោរពេញដោយទំនើបកម្មដែលសម្រិតសម្រាំងដោយចុងភៅ សេង សុធា ម្ចាស់ភោជនីយដ្ឋានលំអង និងភោជនីយដ្ឋានម្ហូប ដែលជាភោជនីយដ្ឋានល្បីលំដាប់អន្តរជាតិពីរកន្លែងក្នុងទឹកដីក្រុងសៀមរាប៕