Sovrin
Sovrin
អ្នកច្នៃម៉ូដ បីរូប បង្អួតស្នាដៃគ្នាក្នុងកម្មវិធីក្រមាអាយដលអមដោយការរចនាម៉ូដគួរឱ្យចាប់អារម្មណ៍
FASHION & BEAUTY 6 years ago
កាលពីល្ងាចថ្ងៃទី១៤ ខែកក្កដា នេះ នៅទីលានត្បាញក្រមា (វាលព្រះមេរុ) អ្នកច្នៃម៉ូដកម្ពុជា ៣រូប បានបង្ហាញឈុតរបស់ខ្លួនដល់អ្នកទស្សនាយ៉ាងច្រើនកុះករ ក្នុងការប្រឡងចម្រៀងក្រមាអាយដល(Idol)វគ្គផ្តាច់ព្រ័ត្រ ដែលបានរៀបចំឡើងដោយក្រុមចលនា Go Go Cambodia ទុកជាការអបអរដល់កម្មវិធី បំបែកឯកទត្តកម្មក្រមាវែងជាងគេលើពិភពលោក ដែលកម្ពុជាទើបទទួលបានកំណត់ត្រាកាលពីថ្ងៃទី០២ ខែមិថុនា នេះ។
លោក KEN និស្សិតឆ្នាំទី០២ ជំនាញច្នៃម៉ូដនៃសាកលវិទ្យាល័យ លីមកុកវីង ដែលជាម្ចាស់ Collection «Life of Cambodia» កម្រងឈុតស្តីពីសម័យកាលដែលកម្ពុជាបានឆ្លងកាត់តាំងពីដើមរៀងមករហូតដល់បច្ចុប្បន្ន។ ឈុតដែលប្រើពេលផលិតអស់២សប្តាហ៍នោះ បានច្នៃលាយគ្នារវាងក្រណាត់ពណ៌មាស ខ្មៅ ស និងក្រហម ដេរភ្ជាប់នឹងក្រមាដោយផ្នែកខ្លះ ដែល Ken បានអះអាងថា បានឆ្លុះបញ្ចាំងពីសេរីភាព និងការតស៊ូរបស់ប្រជាជនកម្ពុជាពីសម័យកាលមួយទៅមួយបានយ៉ាងច្បាស់លាស់។ ពោលដោយក្តីរំភើប KEN ប្រាប់ថា គាត់រំភើបចង់ស្រក់ទឹកភ្នែកនិងមានមោទនភាពណាស់ដែលបានបង្ហាញឈុតខ្លួនជាលើកទី១នៅក្នុងកម្មវិធី បំបែកឯកទត្តកម្មក្រមាវែងជាងគេលើពិភពលោកនេះ។
Collection "Life of Cambodia"
ងាកទៅមើល Collection «Nation of Power» ដែលយកផ្ការំដួលនិងពណ៌ទង់ជាតិខ្មែរទៅប្រើប្រាស់លើការរចនាម៉ូដវិញម្តង។ ឈុតទាំង៥នោះ រចនាដោយលោក គង់ សុធា និស្សិតឆ្នាំទី៤ ជំនាញច្នៃម៉ូដ នៃសាកលវិទ្យាល័យ លីមកុកវីង និងជាម្ចាស់រង្វាន់ច្នៃម៉ូដម្នាក់របស់ក្រុមហ៊ុនអាកាសចរណ៍ម៉ាឡេស៊ី Air Asia ។ មិនខុសពីឈុតរបស់ KEN ប៉ុន្មានដែរ ទោះគ្មានក្រមារចនាលើឈុតទាំង០៥ក៏ដោយ ក៏សម្លេងទះដៃបានបន្លឺឡើងថា ពួកគេក៏ពេញចិត្តនឹងឈុតផ្ការំដួលនោះដែរ។ ឈុតផ្ការំដួលដែល សុធា អះអាងថា ខ្លួនមានចេតនាបង្ហាញដល់ ស្ត្រីខ្មែរពីជម្រើសម៉ូដស៊ិចស៊ីដែលមើលអាចសក្តិសមនឹងស្រ្តីខ្មែរពាក់បាន។ ក្រៅពីរំភើបនិងត្រេកអរដែលបានក្លាយជាចំណែកនៃព្រឹត្តិការណ៍នេះ គង់ ក៏បានលួចខ្សឹបថា ខ្លួនកំពុងបង្កើតម៉ាកសម្លៀកបំពាក់ផ្ទាល់ខ្លួនមួយឈ្មោះថា «គង់-KONG»។
Collection "Nation of Power"
បានអានពីអ្នកច្នៃម៉ូដជាបុរសហើយ ចុងក្រោយនេះទៅដឹងពីអ្នកច្នៃម៉ូតជានារីម្តង គឺ អ្នកជំនាញច្នៃម៉ូដក្រមា ឈុន ម៉ាលៀង នារីវ័យ២៣ឆ្នាំ ដែលជាមនុស្សម្នាក់ក្នុងចំណោមមនុស្សជាច្រើនទៀត បានប្រើពេលវេលានិងមធ្យោបាយផ្សេងៗ ដើម្បីជំរុញការប្រើប្រាស់ក្រមា នៅកម្ពុជាឱ្យមានសន្ទុះខ្លាំងឡើង។ Collection ថ្មី ដែលមានឈ្មោះថា «ក្រមាចម្រុះពណ៌» នេះ បានបង្ហាញពីភាពសម្បូរបែបរបស់ក្រមាសម្រាប់ប្រើក្នុងផ្នែកម៉ូដ។ កម្រងឈុតដែលប្រើពេលផលិតមួយសប្តាហ៍នេះ ទស្សនិកជនបានទះដៃសាទរគ្រប់ៗគ្នា ជាពិសេសឈុត អប្សរាក្រមា តែម្តង។ Collection នេះ ម៉ាលៀង បានច្នៃក្រមាលាយជាមួយក្រណាត់ផ្សេងទៀត ដែលខុសពីឈុតមុនៗ ម៉ាលៀង បានប្រើក្រមាទាំងអស់តែម្តង លើកលែងឈុត អប្សរាក្រមា ចេញដែល ម៉ាលៀង នៅរក្សាការប្រើក្រមាទាំងអស់ដដែល។ អ្នកច្នៃម៉ូតដែលមានឱកាសបង្ហាញឈុតក្រមារបស់ខ្លួនទាំងអស់ដល់ទៅ៦ដងមកហើយនេះ ក៏រំភើបនិងបានសម្តែងមនោសញ្ចេតនាអរគុណដល់អ្នកគាំទ្ររបស់ខ្លួនដែរ ជាពិសេសឱកាសដែលបានក្លាយទៅជាផ្នែកមួយនៃព្រឹត្តិការណ៍ បំបែកឯកទត្តកម្មក្រមាវែងជាងគេលើពិភពលោក របស់កម្ពុជានៅពេលនេះ។ ក្រៅពីតារាបង្ហាញម៉ូដ អ្នកច្នៃម៉ូដ បេក្ខជនប្រឡងចម្រៀង កម្មវិធីនោះក៏មានសិល្បករល្បីផ្សេងៗទៀតចូលរួមជាច្រើនដូចជា កញ្ញា ចំរើន សុភា លោក ទីងតុង និម្មិត្ត លោក សេម រ៉ក់ខ័រ ហើយជាពិសេស វីរសិល្បការិនីខ្មែរ លោកស្រី ឌី សាវ៉េត ក៏បានផ្តល់កិត្តិយសធ្វើជាគណៈកម្មាដាក់ពិន្ទុដល់បេក្ខជនប្រឡងផងដែរ ហើយពានរង្វាន់ក្រមាអាយដលបានទៅលើបេក្ខជន ជា សេងហ័រ ច្រៀងបទ អង្គុលីមាល៍៕
Collection "ក្រមាចម្រុះពណ៌"
Article by SVAY LEEMENG
