Sovrin
Sovrin
ភ្នែកជាសរីរាង្គមួយដែលសំខាន់បំផុត ព្រោះវាជួយយើងក្នុងការរស់នៅប្រចាំថ្ងៃដូចជា សិក្សារៀនសូត្រ ធ្វើការ ឬប្រកបរបរអាជីវកម្មផ្សេងៗបានយ៉ាងងាយស្រួល ប៉ុន្តែប្រសិនបើចក្ខុវិញ្ញាណរបស់យើងប្រែជាខ្សោយខុសប្រក្រតី នោះយើងចាំបាច់ត្រូវតែស្វែងរកដំណោះស្រាយដើម្បីកែខៃស្ថានការណ៍ជាប្រញាប់។ តើដើម្បីជំនួយសមត្ថភាពភ្នែកឱ្យមានសុខភាពល្អឡើងវិញ យើងគួរទទួលទានវីតាមីនអ្វីខ្លះ? ខាងក្រោមនេះជាគុណសម្បត្តិរបស់វីតាមីនទាំង៥ចំពោះភ្នែកដែលលោកអ្នកគួរតែយល់ដឹង។
វីតាមីន A
វីតាមីន A ដើរតួនាទីយ៉ាងសំខាន់ក្នុងដំណើរការនៃការមើលពេញលេញនៃពន្លឺភ្នែករបស់អ្នក។ ភ្នែកត្រូវការផលិតសារធាតុពណ៌ជាក់លាក់ដើម្បីឱ្យស្រទាប់នៃកោសិកា Retina ដែលចាប់យករូបភាពរបស់អ្នកដំណើរការបានត្រឹមត្រូវ។ កង្វះវីតាមីន A អាចបញ្ឈប់ការផលិតសារធាតុពណ៌នៅក្នុងភ្នែកទាំងអស់ ដែលនាំឱ្យងងឹតភ្នែកពេលយប់។ ការ៉ុត មានផ្ទុកសារធាតុបេតាកាតូនីន និងកម្រិតនៃវីតាមីន A ច្រើនដែលអាចជួយដល់សុខភាពភ្នែករបស់អ្នកហើយអាចផ្តល់នូវប្រភពវីតាមីនចំពោះភ្នែកដ៏អស្ចារ្យសម្រាប់ជំងឺខ្សោយសរសៃរបាតភ្នែកនិងជំងឺភ្នែកឡើងបាយជាដើម។
វីតាមីន C
វីតាមីន C មានឥទ្ធិពលក្នុងការការពារព្រមទាំងប្រឆាំងនឹងការបំផ្លាញពី UV មកកាន់ភ្នែក ហើយក៏ជួយការពារប្រឆាំងនឹងការខូចខាតអុកស៊ីតកម្ម។ អ្នកអាចរកវីតាមីន C នៅក្នុងផ្លែឈើដូចជាផ្លែក្រូច និងផ្លែស្ត្របឺរីក៏ដូចជាបន្លែដូចជាផ្កាខាត់ណាខៀវ ស្ពៃខៀវ និងម្ទេសជាដើម។ បន្ថែមពីលើការផ្តល់សារធាតុប្រឆាំងអុកស៊ីតកម្មវាក៏អាចជួយកាត់បន្ថយនូវជំងឺឡើងបាយភ្នែក និងផ្ដល់វីតាមីនចំពោះភ្នែកដែលត្រូវការចាំបាច់សម្រាប់ការថយចុះនៃជំងឺសរសៃរបាតភ្នែកផងដែរ។
វីតាមីន B
វីតាមីន B មានអត្ថប្រយោជន៍ជាច្រើនចំពោះសុខភាពភ្នែក។ លើសពីនេះ វីតាមីន B6, B9 និង B12 ក៏ជាវីតាមីនដែលត្រូវការចាំបាច់ចំពោះភ្នែកផងដែរ។ ដោយវីតាមីនទាំងអស់នេះសុទ្ធសឹងតែអាចកាត់បន្ថយហានិភ័យនៃការរលាក និងជួយការពារអ្នកពីការវិវត្តរបស់ជំងឺភ្នែកឡើងបាយ (AMD) ។ ប្រភេទវីតាមីន B ទាំងបីនេះភាគច្រើនមាននៅក្នុងថ្លើមសត្វ។
វីតាមីន E
វីតាមីន E ផ្ទុកទៅដោយសារធាតុប្រឆាំងអុកស៊ីតកម្ម អាចជួយការពារភ្នែករបស់អ្នកពីការបំផ្លាញរ៉ាឌីកាល់សេរីបានយ៉ាងល្អ។ ភាគច្រើនវាត្រូវបានគេប្រើនៅក្នុងអាហារបំប៉នប្រចាំថ្ងៃដែលហៅថា AREDS ជាការព្យាបាលនៃជំងឺ AMD ហើយវាមានបរិមាណខ្ពស់ក្នុងរបបអាហាររបស់អ្នកដូចជាគ្រាប់អាល់ម៉ុន សណ្តែកដី និងគ្រាប់ផ្កាឈូករ័ត្នជាដើម។ គ្រាប់ធញ្ញជាតិទាំងអស់នេះ សម្បូរទៅដោយវីតាមីន E ដែលមានឥទ្ធិពលល្អផ្សារភ្ជាប់ជាមួយនឹងការថយចុះហានិភ័យនៃជំងឺភ្នែកឡើងបាយយ៉ាងមានប្រសិទ្ធភាព។
អាស៊ីតខ្លាញ់អូមេហ្គា ៣
អាស៊ីតខ្លាញ់ Omega-3 ក៏អាចជួយកាត់បន្ថយហានិភ័យនៃសម្ពាធភ្នែកខ្ពស់ ដែលអាចនាំឱ្យកើតជំងឺដក់ទឹកក្នុងភ្នែក។ អាស៊ីតខ្លាញ់ Omega-3 ក៏អាចជួយការពារ និងព្យាបាលរោគសញ្ញាភ្នែកស្ងួត ដែលជាជំងឺភ្នែកទូទៅដែលមនុស្សភាគច្រើនតែងតែជួបប្រទះ។ រោគសញ្ញានៃភ្នែកស្ងួតរួមមាន រមាស់ភ្នែក ក្រហាយ និងក្រហម។ ប្រិយមិត្តអាចរកអាស៊ីតខ្លាញ់អូមេហ្គា៣ នៅក្នុងពពួកត្រីសមុទ្រដូចជា ត្រី Sardines ត្រី Mackerel ត្រី Tuna ត្រី Salmon និងត្រីTrout ជាដើម៕
Article by NI CHANNIKA
